Ստեփան Զաքարյան

Բազմաթիվ հաղորդաշարերի, ռադիոբեմականացումների և բեմադրությունների հեղինակ է Ստեփան Զաքարյանը, որոնց թվում են «Սասնա Ծռեր»-ը, «Ձայն մեծաց», «Խաչելություն», «Խոր Վիրապ» և «Թուղթ առ փրկիչ» պիեսները:
Ծնվել է 1957թ. Երևանում: 1978թ. ավարտել է Խ. Աբովյանի անվան մանկավարժական ինստիտուտի կուլտուրայի ֆակուլտետի ռեժիսորական բաժինը: 1979-81թթ. ռեժիսորի ասիստենտ է աշխատել հեռուստաֆիլմերի «Երևան» ստուդիայում: 1981-83թթ. աշխատել է «Պիոներ» ամսագրի խմբագրությունում՝ որպես գրական աշխատող:
1983թ. Ստեփան Զաքարյանն աշխատանքի է անցել Հեռուստատեսության և ռադիոյի պետական կոմիտեում` նախ որպես խմբագիր, հետո՝ բաժնի վարիչ, գործակալության պետի տեղակալ և գլխավոր խմբագիր: 1987թ. Մոսկվայում ավարտել է հեռուստատեսության և ռադիոյի աշխատակիցների վերապատրաստման դասընթացը, 1993թ. նշանակվել է Հեռուստատեսության և ռադիոյի պետական կոմիտեի նախագահի տեղակալ, իսկ 1996թ.` Հայաստանի ռադիոընկերության գլխավոր տնօրեն:
1997-98թթ. աշխատել է Երևանի քաղաքապետարանում՝ որպես մշակույթի, երիտասարդության հարցերի և սպորտի վարչության պետ, 1999-07թթ. եղել է ՀՀ Ազգային ժողովի պատգամավոր:
2007-ից առ այսօր Ստեփան Զաքարյանը Հանրային հեռուստառադիոընկերության խորհրդի անդամ է:
Ամուսնացած է, ունի չորս երեխա: