Սուսաննա Շահինյան

Ծնվել է 1951թ.: Ավարտել է Երևանի պետական համալսարանի արևելագիտության ֆակուլտետի Իրանի պատմության բաժինը: Սուսաննա Շահինյանը երրորդ կուրսի ուսանողուհի էր, երբ մասնակցեց Հայկական հեռուստաընկերության հայտարարած մրցույթին և ընդունվեց որպես հաղորդավար` տարիներ շարունակ հեռուստահաղորդավարական արվեստի գաղտնիքները յուրացնելով հայկական հեռուստահաղորդավարական դպրոցի հիմնադիր Նառա Շլեպչյանի ղեկավարությամբ:
1972-93թթ. Ս. Շահինյանը հեռուստատեսության առաջատար հաղորդավարներից էր. վարել է բազմաթիվ երաժշտական ծրագրեր («Երաժշտական հանդիպումներ», «Հեղինակային երգ», «Երաժշտական փոստարկղ», «2230», «Ազգագրական երաժշտության պատմություն» և այլն), երիտասարդական, մանկական, տեղեկատվական («Համայնապատկեր», «Լրաբեր»,), ամանորյա հաղորդումներ, հանրապետական փառատոններ, Հայկական հեռուստատեսության ծրագրերը ներկայացրել է Խորհրդային Միության հանրապետություններում: 1993-2003թթ. ապրել և աշխատել է Հոլանդիայում: 2004թ. Հանրային հեռուստառադիոընկերության խորհրդի նախագահ Ալեքսան Հարությունյանի նախաձեռնությամբ վերականգնվեց «Երաժշտական փոստարկղ» հաղորդաշարը և Սուսաննա Շահինյանը հրավիրվեց Հայաստան` վարելու այդ ծրագիրը:
Այժմ Սուսաննա Շահինյանը «Երաժշտական փոստարկղ»-ի հեղինակն ու հաղորդավարն է, արժանացել է ՀՀ մշակույթի վաստակավոր գործչի պատվավոր կոչմանը, ինչպես նաև պարգևատրվել է ՀՀ վարչապետի հուշամեդալով: