Ցուցադրում է Հայաստանը
Հեռուստատեսությունում փոխանակային հաղորդումների հիմքը դրվեց 1963թ. մայիսի 28-ին կինոհաղորդումների խմբագրությունում ստեղծված բաժնով, որի մասնակցությամբ Թիֆլիսում պատրաստվեց «Բարեկամության լրատու» հեռուստահանդեսի առաջին հաղորդումը: Այս հանդեսը Հայաստանի և Վրաստանի հեռուստաէկրաններին ցուցադրվել է ամիսը մեկ անգամ:
«Ցուցադրում է Հայաստանի հեռուստատեսությունը» ծրագիրը Կենտրոնական հեռուստատեսությամբ ներկայացվեց 1964-ի դեկտեմբերի 15-ին: Այդ երեկո հայկական հեռուստատեսության ծրագրերը դիտեցին ԽՍՀՄ միլիոնավոր հեռուստադիտողներ: Առաջնային էր դարձել հանրապետությունում Կենտրոնական հեռուստատեսության ծրագրերի ընդունումը, որն իրականացավ Երևան-Ռուսթավի ռադիոռելեային գծի շինարարությամբ: Արդեն 1965-ից Հայաստանի հեռուստաեթերից փորձնական հաղորդումներ տրվեցին Մոսկվայից, Լենինգրադից, Թբիլիսիից: Հայաստան մտան նաև «Ինտերվիդենիա» և «Եվրավիդենիա» համակարգերը:
