Գունավոր պատկերի եթերամուտը

1973թ. մարտի 17-ից հեռուստատեսությունը մշտական աշխատանքի է հրավիրում գունավոր շարժակայանի, հեռուստատեսության արտադրական լաբորատորիայի, հաղորդման տեսագրման առաջին ինժեներներին:
1973թ. մայիսմեկյան շքերթը Երևանի Լենինի անվ. հրապարակից հեռարձակվեց գունավոր պատկերմամբ: Սկզբնական շրջանում գունավոր հաղորդումները տրվում էին միայն շարժակայանով` հանրապետության խոշոր տոնակատարություններից, հանդեսներից, մարզական միջոցառումներից: Արդեն 1978-ից Հայաստանի հեռուստատեսության առաջին և երկրորդ ծրագրերի հաղորդումների մոտ 50 տոկոսը եթեր էր տրվում գունավոր պատկերով:
1973-ի օգոստոսից սկսեցին եթեր հեռարձակվել առաջին տեսագրված հաղորդումները, որոնք 1978-ին կազմում էին հաղորդումների 70 տոկոսը:

1971-79թթ. եթերն առատ էր սեփական կինոնկարներով և գեղարվեստական հաղորդումներով. «Ցուցադրում է հեռուստատեսային կինոտունը» խորագրով ներկայացվում էին գրական-գեղարվեստական նյութեր, բեմադրություններ, կինոնկարներ: 1971-ի հունվարի 25-ին ցուցադրվեց Թամարա Բիտյուցկայայի բեմադրած «Երեկոյից մինչև կեսօր» դրաման: Այս թվականներին թատերասերներին է հանձնվել մոտ 40 բեմադրություն` Շիրվանզադեի «Շառլատանը», Թ. Ուիլյամսի «Ցանկության տրամվայը», Իբսենի «Պեր Գյունտը» և այլն, իսկ 1971-ի դեկտեմբերի 25-ին կինոհաղորդումների բաժինը ԽՍՀՄ-ում առաջին անգամ բացեց «Վավերագրական կինոյի ժամ» նոր հաղորդաշարը: