Տեխնիկական վերազինում

1977թ. նոյեմբերի 29-ին գործարկվեց 311.7 մետր բարձրությամբ նոր հեռուստաաշտարակը և «Օրբիտա-2» տիեզերական կապի կայանը, որոնք հնարավորություն տվեցին Մոսկվայից ընդունել համամիութենական հեռուստատեսության երկրորդ ծրագիրը:

Հայկական հեռուստատեսության օրվա հաղորդումների միջին տևողությունը հասավ 12 ժամի: Հանրապետության առաջին ծրագիրը դիտում էր բնակչության 96 տոկոսը, երկրորդ ծրագիրը` 55-ը: Իսկ արդեն 1978թ. հանրապետությունում կարողացան դիտել նաև Կենտրոնական հեռուստատեսության չորրորդ ծրագիրը: Հաղորդումների տոկոսային ցուցանիշներն էին` լրատվական` 25, հասարակական-քաղաքական` 9, երիտասարդական` 4.5, բանակայինների և սահմանապահների համար` 6, դրամատիկական` 3.5, երեխաների և անչափահասներ համար` 10, ուսումնական` 13, երաժշտական` 23, մարզական` 4, հայտարարություններ և գովազդ` 4:

1978-ին հանրապետությունում կար շուրջ 500.000 հեռուստացույց, որից 100.000-ը` գունավոր: Հայաստանը հեռուստացույցների մասսայականացման ծավալներով միութենական հանրապետությունների մեջ գտնվում էր երկրորդ տեղում, իսկ հեռուստահաղորդումներ դիտելու ընդգրկմամբ, ինչպես նաև հաղորդումների ծավալով առաջին տեղն էր գրավում միութենական հանրապետությունների շարքում:
Հեռուստահաղորդումների ընդհանուր տևողությունը կազմում էր օրական 19 ժամ: Հաղորդումների մոտ 50 տոկոսը եթեր էր տրվում գունավոր պատկերով, իսկ 70 տոկոսը հեռարձակվում էր տեսագրված: