Լենինի աշխատասենյակում Հայաստանի քարտեզն էր

«1962-ին նոր էի վերադարձել բանակից և կարոտած քայլում էի Երևանի փողոցներով: Հանդիպեցի նախկին հարևանիս` Հրաչ Մելքոնյանին, ով աշխատում էր հեռուստատեսությունում: Հրավիրեց այնտեղ: Թեպետ հեռուստատեսությունն ինձ անծանոթ ոլորտ էր, բայց հաջորդ առավոտյան գնացի ռադիոկոմիտե: Ինձ տեսնելուն պես Հրաչը վեր կացավ տեղից, «աշխատիր, տղա ջան, աշխատիր» ասելով` ներկայացրեց ռեժիսորներ Գրիգոր Էյրամջյանին ու Գուրգեն Աբաջյանին,-պատմում է հեռուստաօպերատոր Ալբերտ Հովսեփյանը և շարունակում:-Լավ եմ հիշում, այդ տարիներին նկարահանումներ էինք կատարում կենտրոնական հեռուստատեսության «Ժամանակ» լրատվական ծրագրի, նաև մեր «Համայնապատկեր»-ի, իսկ հետագայում` «Լրաբեր»-ի համար: Օրվա իրադարձությունները լուսաբանող նյութեր նկարելուց բացի` մասնակցում էի նաև հեռուստաֆիլմերի ստեղծմանը: Մի շարք ֆիլմեր նկարահանեցինք Լենինի ծննդյան 100-ամյակի կապակցությամբ: Ռեժիսորը Գրիգոր Էյրամջյանն էր: Հանդիպեցինք Լենինի հետ շփված տարբեր մարդկանց` գրող-հրապարակախոս Մարիետա Շահինյանին, Լենինի վարորդ, հայազգի Միրոն Օհանովին, Լենինի գրադարանավարուհի Շուշանիկ Մանուչարյանցին և այլոց: Լենինի 100-ամյակի օրերին Մոսկվայում նկարահանումներ էին կատարում գրեթե բոլոր հանրապետությունների ներկայացուցիչները: Ռեժիսոր Ներսես Հովհաննիսյանը` Ներսիկը, կարողացավ Կրեմլում նկարահանումներ կատարելու թույլտվություն ստանալ: Հայաստանի Մինիստրների սովետի նախագահ Բադալ Մուրադյանի առաջարկով նկարահանումներ կատարեցինք Լենինի աշխատասենյակում, որտեղ աշխատասեղանի վերևում Հայաստանի քարտեզն էր փակցված»: