Հեռուստաեթերի երաժշտությունը
60-ականների կեսերից երաժշտական հաղորդումների գլխավոր խմբագրությունը մեկը մյուսի հետևից ներկայացնում է օպերաներ, բալետներ, մշտական եթերաժամով հեռարձակվող պարի և երգի հայկական անսամբլների համերգներ: Առանձին հաղորդումներով ներկայացվում են ճանաչված կոմպոզիտորների և երգիչների կյանքն ու գործունեությունը:
1966թ.-ից գործում է Հայաստանի հեռուստատեսության և ռադիոյի սիմֆոնիկ նվագախումբը, որի գեղարվեստական ղեկավարն էր Օհան Դուրյանը: Նվագախումբն իր առաջին համերգը տվել է 1966թ. մայիսի 6-ին` ռադիոյի օրվա առթիվ: 1970-ից մինչև 1983-ը սիմֆոնիկ նվագախմբի մենակատարն էր հանրապետության ժողովրդական արտիստ, պետական մրցանակի դափնեկիր Լուսինե Զաքարյանը: Սիմֆոնիկ նվագախմբից բացի` այդ նույն ժամանակահատվածում ստեղծվում է էստրադային նվագախումբը: 1966-ի սեպտեմբերից նվագախմբի գեղարվեստական ղեկավարն էր Մարտին Վարդազարյանը, իսկ 1972-ից` Մելիք-Մավիսակալյանը:
1979թ. Հեռուստատեսության և ռադիոյի նվագախմբերի շարքում ավելացավ ևս մեկը: Կոմպոզիտոր Էդգար Հովհաննիսյանի նախաձեռնությամբ ստեղծվեց կամերային երգչախումբը: 1984թ.-ից երգչախմբի գեղարվեստական ղեկավարը և գլխավոր դիրիժորը Տիգրան Հեքեքյանն էր:
Հայկական ժողովրդական և էստրադային երգի տարածման գործում մեծ դեր է ստանձնում երաժշտական հաղորդումների խմբագրության «Երաժշտական փոստարկղ» հաղորդաշարը: Առաջին հաղորդումը եթեր հեռարձակվեց 1977թ. նոյեմբերի 25-ին: Բացի հայկական երաժշտությունից` հաղորդումը հեռուստադիտողին էր ներկայացնում տարբեր ժողովուրդների և ժանրերի երգարվեստը: Սկզբնական շրջանում հաղորդումը եթեր էր տրվում ամիսը մեկ անգամ, այնուհետև դարձավ շաբաթական:
