Ժողովրդավարական ռոմանտիզմի շրջան
80-ականների կեսերը ԽՍՀՄ-ի ամբողջ հասարակական-քաղաքական կյանքի, ինչպես նաև հեռուստատեսության համար դարձան վերափոխումների կարևոր շրջան: Ազատ խոսքը, գրաքննության թուլացումը, քաղաքական մթնոլորտի փոփոխությունները հեռուստատեսությանը թույլ տվեցին լինել ավելի ազատ և անկողմնակալ: Առաջին պլան մղվեցին հրապարակախոսական-վերլուծական հաղորդումները, վերաարժեվորվեցին գեղարվեստական նյութերը:
Վերականգնվեց ուղիղ եթերը` ապահովելով հեռուստատեսային անկաշկանդ խոսք: Հեռուստադիտողներն ուղիղ հեռախոսակապով հնարավորություն ստացան միանալ հաղորդումներին: Սկիզբ դրվեց ինտերակտիվ շփմանը: Ծնունդ առավ «Առաջարկում է հեռուստադիտողը» հաղորդաշարը, որ ներկայացնում էր մարդկանց կարծիքները տարբեր ծրագրերի վերաբերյալ, երկխոսության միջոցով բացահայտում այն պահանջները, որ ուներ հեռուստադիտողը: Երկխոսական բնույթի հաղորդումներից հատկանշական էին «Քո կարծիքը», «Մենք, դուք, նրանք», «Մարդիկ, կենցաղ, բարքեր», «Հարցազրույց ձեր խնդրանքով» ծրագրերը:
Այս շրջանում որակական նոր փոփոխություններ է կրում «Լրաբեր» տեղեկատվական ծրագիրը: Լուրերի առավել օպերատիվ բնույթը, համեմատաբար անկողմնակալ մատուցումը ծրագիրը դարձնում է առաջնային: Հեռուստատեսային խոսքը դառնում է համարձակ: «Անդրադարձ», «Հետադարձ կապ» հաղորդումները հեռուստադիտողին են ներկայացնում հասարակական կյանքում առկա տարբեր խնդիրների վերլուծություններ, փորձում գտնել դրանց հաղթահարման ճանապարհները: Մեծանում է հասարակության վստահությունը հեռուստատեսային խոսքի հանդեպ:
