1988 թվական, երկրաշարժ
1988 թ. դեկտեմբերի 7-ին, ժամը 11:41-ին բնության ահարկու տարերքը հազարավոր հայերի կյանք խլեց: Հայաստանի հյուսիսային շրջանների բնակավայրերը հաշված վայրկյանների ընթացքում վերածվեցին ավերակների:
Սպիտակի երկրաշարժի առաջին իսկ օրերից հեռուստատեսության լրատվության գլխավոր խմբագրության լրագրողներն աղետի գոտում էին: Այստեղից պատրաստված ռեպորտաժներով էին սկսվում և ավարտվում «Լրաբեր»-ի, «Վերջին լուրեր»-ի հատուկ թողարկումները: Հեռուստատեսության նկարահանող խմբերի տեսանյութերը դարձան ոչ միայն Հայաստանի, այլև աշխարհի հեռուստաընկերությունների սեփականությունը: Դրանք հեռարձակվում էին Կենտրոնական հեռուստատեսության «Ժամանակ» ծրագրով, աշխարհի տարբեր առաջավոր հեռուստաընկերությունների եթերներով:
«Փյունիկ. վերականգնման խրոնիկա» խորագրով հաղորդաշարի թողարկումներ էին պատրաստում բոլոր գլխավոր խմբագրությունները: Հաղորդաշարի նպատակն էր հեռուստախցիկի օբյեկտիվով հետևել աղետի գոտու վերականգնման աշխատանքներին: Եթեր տրվեց «Մտորումներ երկրաշարժի մասին» հաղորդաշարը, որտեղ ընդգրկվեցին հեղինակավոր գիտնականների և մտավորականների կարծիքները, վերլուծությունները մեծ արհավիրքի վերաբերյալ:
Երկրաշարժից հետո հազարավոր մարդիկ փնտրում էին իրենց հարազատներին, ընկերներին: «Երևանը և երևանցիները» խմբագրությունը հանրապետության Ներքին գործերի նախարարության հետ համատեղ ստեղծում է «Որոնում» ծառայությունը և նույնանուն ծրագիրը: Հաղորդման թողարկումները եթեր էին տրվում շաբաթական հինգ անգամ, օգնում մարդկանց գտնել երկրաշարժից տուժած իրենց հարազատներին:
