Գոհար Գասպարյան

Ծնվել է 1985 թ. Երևանում: 2002 թ. ավարտել է Խ. Դաշտենցի անվ. #114 միջնակարգ դպրոցը: 2002-07 թթ. սովորել է Երևանի` Վ. Բրյուսովի անվ. պետական լեզվաբանական համալսարանում` ստանալով անգլերենի մասնագետի և միջազգային լրագրողի որակավորում: 2007-09 թթ. ուսումը շարունակել է Երևանի պետական համալսարանում` լրագրության ֆակուլտետի մագիստրատուրայում, նաև ստացել ԵՊՀ-ին կից «Ժուռնալիստիկայի հայկական դպրոց» մագիստրոսական ծրագրի միջազգային դիպլոմ: 1996-2001 թթ. եղել է Հանրային հեռուստաընկերության «3-րդ ալիք» նախագծի մանկապատանեկան հաղորդաշարերի հաղորդավար («Շնորհալի երեխաներ», «3-րդ վագոն» և այլն):
2003-ից առ այսօր Գոհար Գասպարյանն աշխատում է Հայաստանի Հանրային հեռուստաընկերությունում որպես ծրագրերի հաղորդավար և հեղինակ, միջազգային նախագծերի մեկնաբան («Այս երեկո/առավոտ/գիշեր», «Առաջին ծրագիր», «Ռուբիկոն», «Թոփ 10» և այլն): 2006 թ.-ից առ այսօր «Եվրատեսիլ» և «Մանկական եվրատեսիլ» երգի մրցույթների մեկնաբանն է, 2010 թ.-ից` «Եվրատեսիլ»-ի հայկական պատվիրակության ղեկավար:
Գոհար Գասպարյանի հաղորդավարական գործունեության մեջ հատուկ տեղ են զբաղեցնում մշակութային և մարզական հատուկ նախագծերը, համերգներն ու բացառիկ հարցազրույցները («Մանկական եվրատեսիլ-2010»-ը Երևանում, «Պլաչիդո Դոմինգո», «Ջիվան-80», «Ֆանի Արդան», «Արթուր Աբրահամ», «Շախմատի աշխարհի չեմպիոններ», «Եվրատեսիլի ազգային ընտրություններ», «Ոսկե Ծիրան» և այլն), ինչպես նաև առանձին միջոցառումների կազմակերպումը (www.unistaff.am):
2012թ.-ի հոկտեմբերից առ այսօր վարում է «Գտնված երազ» հաղորդաշարը: