Building
Հետ

Մարգարիտա Գրիգորյան

Գործադիր տնօրեն

Ամեն ինչ սկսվեց Հանրայինից` 1990-ականներին, երբ Նորքի գագաթը ոտքով կտրելն առօրյա մարտահրավերներից էր: 
 
1992 թ-ին ԵՊՀ ժուռնալիստիկայի ֆակուլտետում սովորելուն զուգահեռ Մարգարիտա Գրիգորյանն արդեն համագործակցում էր Հանրայինի «Խճանկար» հաղորդաշարի հետ՝ որպես ադմինիստրատիվ հարցերով օգնական, համատեղելով թղթակցի աշխատանքը «Հայաստանի Հանրապետություն», «Հայաստան» օրաթերթերում և «Արմենպրես» լրատվական գործակալությունում: 
 
Հետագայում «Լրաբեր» լրատվական, «Այլ ալիք», «Ավանգարդ» հաղորդաշարերում աշխատել է որպես լրագրող, խմբագիր և հեղինակ: Այդ տարիներին հեռուստատեսային իր գործունեությունը նա համատեղում էր ռադիոյի հասարակական-քաղաքական հաղորդումների գլխավոր խմբագրությունում աշխատանքի հետ: Կարիերայի մեկնարկի երրորդ զուգահեռ օղակը «Այլընտրանք» ստեղծագործական խմբի ստեղծումն ու ղեկավարումն էր: 
Որոշ ժամանակ անց, իր ընկերների հետ միասին ստեղծեց նաև այն ժամանակ առաջին վերլուծական, քաղաքական, տնտեսական ու մշակութային բաժիններով հագեցած «Վարկանիշ» ամսագիրը՝ դառնալով նաև վերջինիս գլխավոր խմբագիրը: 
 
2005 թ-ին Հայաստանի պետական կառավարման ակադեմիայի Հանրային կառավարման բաժնում ձեռք բերեց իր երկրորդ մասնագիտությունը, որը կարևոր խթան դարձավ փորձն ու հմտությունները ներդնելու հայաստանյան խոշոր կառույցների մարքեթինգային առաջխաղացման և մենեջմենթի իրականացման գործում. այդ ընթացքում նա եղել է Հայաստանի էլեկտրական ցանցեր ընկերության ԶԼՄ և հասարակայնության հետ կապերի ծառայության ղեկավարը, որտեղ աշխատել է նաև որպես գլխավոր խորհրդական, ընկերության ադմինիստրատիվ և սոցիալական հարցերով տնօրեն, «Արմենիա վայն» գործարանի մարքեթինգի բաժնի ղեկավարը: 
 
Մարգարիտա Գրիգորյանը եղել է ՀՀ մշակույթի, երիտասարդության և սպորտի նախարարության լրատվական ծառայության պետը, մշակույթի նախարարի խորհրդականը՝ նախաձեռնելով մի շարք մշակութային նախագծեր, նաև իրականացրել է ռուսական առաջատար ОРТ և РТР ընկերությունների Հայաստանի մասին պատմող մի քանի վավերագրական ֆիլմերի նկարահանման կազմակերպումն ու համակարգումը: 
 
2009 թ-ից եղել է  «Արմենիա» հեռուստաընկերության գլխավոր պրոդյուսերը, որտեղ իրականացրել է խոշոր նախագծեր՝ անմիջական մասնակցություն ունենալով մի շարք ծրագրերի և հեռուստանովելների ստեղծման գործում:
 
2013 թ-ին նշանակվել է Հանրային հեռուստառադիոընկերության խորհրդի աշխատակազմի հեռուստանախագծերի գծով խորհրդատու:
Նույն թվականին նշանակվել է Հանրային հեռուստաընկերության գործադիր տնօրեն:      
 
1998–2015 թթ. դասախոսել է ԵՊՀ ժուռնալիստիկայի ֆակուլտետում: Մշտապես լինելով երիտասարդների կողքին, նպաստել է նրանց կայացմանը, օգնել է լավագույն ուսանողներին աշխատել իրենց ընտրած մասնագիտությամբ, խթանել և կարևորել է երիտասարդների մուտքը հեռուստատեսություն՝ արժևորելով սերունդների աշխատանքային երկխոսության ապահովումը: Հեռուստաընկերության ղեկավարի բազմազբաղ պաշտոնը չի պարտադրել նրան հրաժարվել դասախոսական գործունեությունից և 2013 թ-ից նա իր հմտություններն է փոխանցում «Մասս մեդիա» գիտակրթական կենտրոնի ուսանողներին: 
 
Մարգարիտա Գրիգորյանի անմիջական ջանքերով և մասնակցությամբ Հանրային հեռուստաընկերությունում նաև տեղի են ունեցել մի շարք խոշոր ենթակառուցվածքային փոփոխություններ՝ էլ-փաստաթղթաշրջանառության, կադրային ծրագրի ներդրումից մինչև Հանրային հեռուստաընկերության արխիվի մատչելիության նախաձեռնություն՝ անմիջական մասնակցություն ունենալով նաև տեխնիկական վերազինման և եթերի թվայնացման գործընթացներին, ինչը հեռուստաընկերության աշխատանքի կառավարումն ու համակարգումը դարձրել է առավել օպտիմալ, թափանցիկ՝ հաղորդելով նոր որակ և մրցունակություն: 
 
Աշխատանքային գործունեության մեջ առավելապես կարևորում է անձնական շահը պրոֆեսիոնալ աշխատանքից տարանջատելու կարողությունը և միևնույն ժամանակ բարձր է գնահատում գործընկերների ուժեղ կողմերը և մարդկային որակները՝ երբեք չվախենալով հենվել դրանց վրա: Կարևորում է երիտասարդ սերնդի մշտական ներկայությունը Հանրայինում՝ միշտ հաշվի նստելով ավագ ընկերների կարծիքի ու փորձառության հետ: 
 
Մարգարիտա Գրիգորյանը բանասիրական գիտությունների թեկնածու է, ամուսնացած է, ունի երկու զավակ: