Building
Հետ

Ալեքսանդր Հակոբյան

Գլխավոր պրոդյուսեր

Յուրաքանչյուր հեռուստատեսային նախագծի հաջողություն թիմային աշխատանքի արդյունք է: Ցանկալի վերջնակետին հասնելու համար կարևոր է ոչ միայն ծրագրի ստեղծման ընթացքը, այլև, թե ինչպես այն կդիրքավորվի ու կմատուցվի հանրության լայն շերտերին: Ալեքսանդր Հակոբյանի էությունը երբեմն դժվար է զատել մասնագիտությունից, քանի որ նա առանձնակի հավատով և նվիրումով է գտնում  միջոցներ, մեխանիզմներ Հանրայինի հեռուստաարտադրանքը հեռուստադիտողին ներկայացնելու, հասանելի և հետաքրքրական դարձնելու համար:

Տարածաժամանակային ինքնատիպ ընկալում և սասունցիական արմատներ ունեցող Ալեքսանդր Հակոբյանի համար անծայրածիր աշխարհը սկսվում էր հեռուստաաշտարակից, իսկ համառությունն ու սպասելու ունակությունը հուշում էր, որ Նորքի բարձունքից երևանյան համայնապատկերով հիանալու սովորությունը վերաճելու էր ամենօրյա աշխատանքային կարևոր բաղադրիչի: Նա ունի իրադարձությունների և դեպքերի յուրատիպ ընկալում, որը երբեմն կարող է արտառոց լինել այլ մարդկանց համար:

Ալեքսանդր Հակոբյանի աշխատանքային գործունեության հիմքում միշտ եղել է հանրության լայն շերտերի հետ շփումն ու գործակցությունը: Սիրում է մարդկանց, նրանցից յուրաքանչյուրին համարում նոր և չկրկնվող տեսակ:

Ալեքսանդր Հակոբյանի աշխատանքային գործունեության հիմքում գործակցությունն է միջազգային հայտնի կազմակերպությունների հետ, այդ թվում՝ “JICA”, “IREX”, “Maeutica”:  

2009 թվականից աշխատել է «Առէկսիմբանկ-Գազպրոմբանկ»-ի խմբում՝ սկզբում որպես CRM և մարքեթինգային դեպարտամենտի գլխավոր մասնագետ, այնուհետ նաև մարքեթինգի և հասարակայնության հետ կապերի դեպարտամենտի ղեկավար, որակի գծով պատասխանատու:

Ալեքսանդր Հակոբյանը ԵՊՀ-ում դասավանդել է տեղեկատվական ներազդում, ինչպես նաև կարիերայի հոգեբանություն առարկաները:

2017 թ-ին եղել է Հանրային հեռուստաընկերության մարքեթինգի և հասարակայնության հետ կապերի տնօրենը:

Այժմ Հանրային հեռուստաընկերության գլխավոր պրոդյուսերն է: