Առաջին տարիներին Արմեն Էլմասյանը պատրաստել է հիմնականում գիտահանրամատչելի հաղորդումներ երեխաների համար, մանկական բեմադրություններ: Նրա հեղինակային հաղորդումներից են ՙՁեր նամակներով՚, ՙՍպորտլանդիա՚, ՙԼեգո՚:
ՙՙՁեր նամակներով՚ հաղորդումն իմ առաջին հեղինակային հաղորդումն էր: Այստեղ հեռուստադիտողների նամակները ներկայացվում էին գեղարվեստական ձեւի մեջ, նամակը բեմադրվում էր: Իսկ ՙՍպորտլանդիան՚, որը հայկական հեռուստատեսության էկրանից չիջավ 22 տարի (1968-90թթ.), ոչ միայն սպորտային ծրագիր, այլ նաեւ` երաժշտական ռեվյու էր, որտեղ կար պայքար, երգ-երաժշտություն: ՙՍպորտլանդիայում՚ մրցել են հանրապետության բոլոր դպրոցների թիմերը: Խաղերն անց էին կացվում ՙԴինամո՚ մարզադահլիճում՚,- պատմում է Արմեն Էլմասյանը:
16 տարի շարունակ ռեժիսոր Արմեն Էլմասյանը պատրաստել է հեռուստատեսության տարեմուտի հանդեսը` ՙՇնորհավոր Նոր տարի՚-ն: Արմեն Էլմասյանի ստեղծած բեմադրություններից ամենահաջողվածներն են ՙՄարդը թամբի վրա՚, ՙՈսկեմազիկը՚, ՙԱնագե մատանին՚, ՙԱյսպիսի սեր՚:
Նա նկարահանել է ՙԳարուն- Երեւան՚ տեսաֆիլմը, որը 4 տարի շարունակ մայիսի 2-ին ներկայացվում էր հեռուստադիտողին: ՙԳարուն Երեւանում՚ երեխաներով լիքը գունավոր տրամվայը, որի ՙվարորդը՚ սիրված երգչուհի Սյուզան Մարգարյանն էր, շրջում էր Երեւանի փողոցներով, իսկ կանգառներին տրամվայի ուղեւոր-երեխաները երգում-պարում էին:
