Էդուրադ Խաչիկօղլյանն աշխատում է հեռուստատեսությունում 1957 թ.-ից: Սկզբնական շրջանում լուսավորող էր, սակայն մի քանի տարի անց արդեն դառնում է կինոօպերատորի օգնական: Երկարատեւ եւ լավ աշխատանքի համար, նա բազմիցս որակավորվել է եւ հասել բարձր կարգի օպերատորի աստիճանի: Խաչիկօղլյանը հաճախ մեկնել է հանրապետության տարբեր շրջաններ, այնտեղ կազմակերպած միջոցառումները լուսաբանելու համար: Խաչիկօղլյանը նկարահանել է կինոակնարկներ` <<Եթերում Ստեփանավանի շրջանն է>> , <<Եթերում Նոյեմբերյանի շրջանն է>> եւ մի շարք այլ ակնարկներ արտասահմանյան երկրների եւ միութենական հանրապետությունների համար:
1970-ականներին նա ներգրավվում է դրամատիկ ներկայացումների նկարահանումներին: Նախ որպես երկրորդ օպերատոր մասնակցում է <<Բարեւ հայրիկներ>>, <<Երկուսը ճոճանակին>>, <<Ծղոտե գլխարկը>> ներկայացումների բեմադրություններին: 1974թ.-ին ինքնուրույն էկրանացմամբ հանդես են գալիս օպերատոր Էդուարդ Խաչիկօղլյանը եւ ռեժիսոր Ջուլետ Մատինյանը` Ի. Ֆրանկոյի <<Ուղեպահի տնակը>>ներկայացմամբ: Այնուհետեւ, Էդուարդ Խաչիկօղլյանը, որպես առաջին օպերատոր, մեծ հաջողությամբ իրականացնում է հեռուստատեսային ներկայացումների նկարահանումներ: Ս. Պայազատի <<Հանդիպում>> պատմվածքի էկրանավորմանը հաջորդեցին Ի. Բուկովչանի <<Լուիջիի սիրտը>>, Դյուրենմաթի <<Ծեր տիկնոջ այցը>> երեք սերիանոց ներկայացումը: Էդիկ Խաչիկօղլյանի օպերատորական ոճում նկատելի կերպով միավորվում էին թատրոնի եւ կինոյի պատկերային հնարները, եւ դրանք ավելի էին ուժեղացնում <<ներկայության էֆեկտը>>: Այսպիսին էին <<Սոնատ շեփորի համար>>, <<Ամենալավ հաճախորդը>> պիեսների էկրանավորումները:
