Էմանվել Մանուկյանը հեռուստառադիո-պետկոմի նախագահ նշանակվեց 1988թ. հունիսին: Ընդամենը մի քանի ամիս, եւ հասարակական կյանքում պիտի մեծ փոփոխություններ տեղի ունենային. ազգային զարթոնք, երկրաշարժ, հետո տնտեսական ճգնաժամ պիտի լիներ:
Նման ծանր պայմաններում այս մեծ լրատվամիջոցի ողջ անձնակազմն Էմանվել Մանուկյանի ղեկավարությամբ փորձում էր մարդկանց հույս ու հավատ ներշնչել, օգնել` դուրս գալ իրավիճակից:
Երկրաշարժից կարճ ժամանակ անց ստեղծվեց աղետից տուժածների մասին հեռուստառադիոհաղորդում: Այն նպատակ ուներ օգնել հարազատներին փնտրող մեր հայրենակիցներին, վերամիավորել հայ ընտանիքներին:
Մոտ 30-րոպեանոց լրատվական թողարկման եթերաժամը կրկնապատկվեց: Հարկավոր էր ոչ միայն ներկայացնել այն ամենը, ինչ կատարվում էր աղետի գոտում, այլ նաեւ` ժողովրդին հոգեբանական օգնություն ցուցաբերել:
Էմանվել Մանուկյանը հեռուստառադիոպետկոմը նախագահեց մինչեւ 1990թ. սեպտեմբեր: Նշելով` որ այս ժամանակաշրջանը մեր կյանքում ամենաբարդերից էր, որ հաճախ ստիպված էր քաղաքական լուրջ որոշումներ ընդունել, նախկին ղեկավարն այնուամենայնիվ ուրախ է, որ կարողացել է մասնագիտական թարմություն բերել հեռուստատեսություն, հղկել լրատվական թողարկման լեզուն, ոճը, բարձրացնել հեռուստառեպորտաժների մակարդակը:
