Հանրապետության վաստակավոր արտիստ, հայ հաղորդավարական դպրոցի ամենահեղինակավոր ներկայացուցիչներից է Ջոն Հակոբյանը:
Չի եղել որեւէ կառավարական հանդիսություն կամ տոնական հաղորդում, որ նա վարած չլինի: Նրա ձայնով են կատարվել ՙՀայֆիլմի՚ մի շարք ֆիլմերի կրկնօրինակումներ: Դրանցից են` ՙԲարեւ, ես եմ՚, ՙԳարունը մերձափնյա փողոցում՚ եւ այլն:
1971թ.-ի առաջին օրվա Հայկական հեռուստատեսության ամենամեծ անակնկալը եղավ ՙՀամայնապատկեր՚ կիրակնօրյա լրատվական նոր հաղորդման հայտնվելը ծրագրերի եթերացանցում: Հունվարի 10-ից ՙՀեռուստատեսային լուրերի՚ փոխարեն եթեր է տրվում ՙՀամայնապատկեր՚-ը` 30 րոպե տեւողությամբ: Սեպտեմբերից հաղորդումը հեռուստադիտողին է ներկայացել ամեն օր: Հաղորդումը վերանվանվեց ՙԼրաբեր՚ 1975-ի հոկտեմբերի 27-ից` պահպանելով իր օպերատիվ եւ առաջնային բնույթը: Ստեղծվեցին նաեւ 10 րոպեանոց ՙՆորություններ՚-ի թողարկումներ` հեռուստատեսային օրվա սկզբում եւ վերջում: Հեռուստալրատվության ընդհանուր ծավալը հասավ 60 րոպեի: 78-ի ապրիլի 1-ից ՙԼրաբեր՚ ծրագիրը սկսվեց հեռարձակվել գունավոր պատկերմամբ:
Հայ հեռուստադիտողը հանրապետության եւ արտերկրի ամենաթարմ նորությունները ստանում էր Ջոն հակոբյանի եւ նրա գործընկերների ներկայացմամբ: Շուտով եթեր է հայտնվում ՙՄարդը եւ օրենքը՚ հաղորդաշարը, որը շատ կարճ ժամանակում մեծ հեղինակություն է ձեռք բերում շնորհիվ նաեւ նրա վարող Ջոն Հակոբյանի:
