Մարատ Մարինոսյանը Հայկական հեռուստատեսությունում աշխատանքի է անցել 1956թ.-ից` ստեղծման առաջին իսկ օրվանից: Հայկական հեռուստատեսությունում անգնահատելի է գլխավոր ռեժիսոր Մարատ Մարինոսյանի կատարած աշխատանքը: Հետագայում Երեւանի գեղարվեստաթատերական ինստիտուտի պրոֆեսորը բազմաթիվ ներկայացումների բեմադրող-ռեժիսորն Էր: Հեռուստատեսությունում աշխատելու առաջին իսկ տարիներից տաղանդավոր ռեժիսորը ձեռնարկում է մի շարք հայտնի պիեսների հեռուստատեսային բեմադրություններ, որոնք այսօր էլ մեծ արժեք են ներկայացնում հեռուստաթատրոնի ոսկե ֆոնդում. Պուշկինի <<Քարե հյուրը>> (գլխավոր դերերում Խորեն Աբրահամյան եւ Մարիետա Սիմոնյան), Չեխովի <<Արջը>> եւ <<Առաջարկությունը>>, Լուկա Քաջարելայի <<Երկու շահում>>, Նար-Դոսի <<Ես եւ Նա>> եւ այլն:
Մեր էկրանի առաջին ներկայացումը կապված է Մարատ Մարինոսյանի անվան հետ: Եղիշե Չարենցի <<Լենինն ու Ալին>>, չնայած ստեղծվեց չափազանց պարզունակ միջոցներով, այնուհանդերձ նոր խոսք եւ նոր հեռանկարներ բացեց հեռուստաթատրոնի համար: Առաջինները, անտեսելով տեխնիկական դժվարությունները, մեծ ոգեւորությամբ ձեռնամուխ են լինում բարդ գործերի էկրանավորմանը: Մարատ Մարինոսյանի անունը հատկապես կապված է Միխայիլ Շոլոխովի <<Մարդու ճակատագիրը>> ներկայացման բեմադրության հետ: Այն հեռուստատեսության առաջին սեփական բեմադրություններից էր: Այստեղ, ի տարբերություն այլ բեմադրությունների, ավելի լայնորեն օգտագործվեցին հեռուստատեսության հնարավորությունները: Առաջին անգամ ներկայացման ժամանակ եթեր տրվեցին կինոներդիրներ:
Հեռուստատեսությունը թողնելուց հետո Մարատ Մարինոսյանը դասավանդում էր Գեղարվեստաթատերական ինստիտուտում եւ անձամբ ղեկավարում այն նորավարտ ռեժիսորների աշխատանքները, ովքեր ցանկանում էին նվիրվել էկրանին:
