1956թ.-ի նոյեմեբերին նորաստեղծ հեռուստատեսության աշխատակիցների ընդունելության մրցույթին շուրջ 400 մարդ էր մասնակցում: Մարկ Պետրոսյանին ընտրեցին երաժշտական բաժնի ղեկավար:

Մոտիկ ու հեռու ամենալայն շրջապատում նրան առանց երկարացնելու Մարկ են կոչում: Հարմար է եւ հասկանալի. ՙՄարկի հաղորդում՚, ՙՄարկի ասույթ՚, ՙՄարկի գիրք՚, ՙՄարկի...՚: Հետաքրքիր բնավորություն, անմիջական ու անհանգիստ, հեշտ բռնկվող, երեխայի պես նեղացկոտ, հաճախ անհաշտ ու ինքնասաց, իր գործի իսկական գիտակը եւ.. հայկական հեռուստատեսության գործիչ:

57թ.-ից երկու տարի ամեն շաբաթ եթերում հայտնված դասական երաժշտությանը նվիրված ՙՈսկե Էկրան՚ հաղորդաշարի հեղինակն է: 1968թ.-ին, Էրեբունի-Երեւան 2750 տարելիցին նվիրված հաղորդման կազմակերպիչն ու խմբագիրն էր: Հաղորդումը ցուցադրվեց Մոսկվայի Կենտրոնական հեռուստատեսությամբ եւ Ինտերվիդենիայով` Արեւելյան Եվրոպայի երկրներում:

Մարկ Պետրոսյանի նախաձեռնությամբ եւ մասնակացությամբ են նկարահանվել հայկական դասական օպերայի հիմնադիր Ալ. Սպենդիարյանի 100-ամյակին նվիրված ֆիլմը, Սայաթ- Նովայի 275 տարելիցին նվիրված հաղորդումը, Արամ Խաչատրյանի, Առնո Բաբաջանյանի, Օհան Դուրյանի, Պավել Լիսիցյանի եւ շատ այլ հայ մեծ երաժիշտների կյանքի ու ստեղծագործական ուղու մասին պատմող հաղորդումներ:

Պահպանվել են մի շարք պատվոգրեր եւ մրցանակներ, սակայն ամենամեծ շնորհը Մարկ Պետրոսյանը համարում է այնպիսի մեծ մարդկանց հետ մտերմության հաստատումը, ինչպիսիք են` Արամ Խաչատրյանը, Մ. Ռոստոպովիչը, Թարիվերդիեւը, Էդուարդ Միրզոյանը, Լուսինե Զաքարյանը, Զարուհի Դոլուխանյանը, Բաշմետը, Սպիվակովը, Կոբզոնը եւ այլ մեծանուն արվեստագետներ:

Մարկ Պետրոսյանը Հայաստանի հեռուստա-տեսության առաջիններից է: Սկզբում եղել է հնչյունային ռեժիսոր, երաժշտական ձեւա-վորող, ապա շուրջ 25 տարի` երաժշտական հաղորդումների գլխավոր խմբագիր: Նա այն եզակիներից է, որ հեռուստատեսությունում է սկզբնավորման օրից մինչ այժմ: