Մավր Դավթյանի գնահատմամբ` հեռուստառադիոպետկոմը ղեկավարելով 1969 թվականի հուլիսից 1970 թվականի սեպտեմբեր` հասցրել է կազմակերպչա-կան մի քանի խնդիրներ լուծել:
Մինչ այս պաշտոնը զբաղեցնելը նա անցել էր կոմկուսի ղեկավար տարբեր օղակներով. եղել էր շրջկոմի, քաղկոմի, կենտկոմի քարտուղար, կոմկուսի կենտկոմի պրոպագանդայի բաժնի վարիչի տեղակալը: Այս ընթացքում, բնականաբար, կապեր էր հաստատել իշխանության տարբեր օղակների հետ, որոնք էլ փորձում էր ծառայեցնել հեռուստատեսությանը եւ ռադիոյին:
Մավր Դավթյանի ղեկավարության օրոք շահագործման հանձնվեց հեռուստատեսության նոր շենքը, որ երկար ժամանակ է` կառուցվում էր, սակայն անընդհատ ինչ-ինչ պատճառներով ավարտին չէր հասցվում: <<Գլխավոր խմբագրությունները ավտոմեքենա չունեին, որ նկարահանումների գնային, օրերով հերթ էին կանգնում, - հիշում է Մավր Դավթյանը: - Ծանոթներիս միջոցով կարողացա ամեն մի խմբագրության մեկական ավտոմեքենա հատկացնել>>:
Մավր Դավթյանը սկսեց բանակցություններ վարել գունավոր հեռուստատեսության ներդրման համար: <<Ասացի` հարեւան Վրաստանն արդեն ներդրել է, ֆրանսիացիներն էլ տեխնիկա են առաջարկում: Կառավարության ղեկավար Բադալ Մուրադյանն առաջարկս ոգեւորությամբ չընդունեց, սակայն որոշ ժամանակ անց արդեն ստիպված էին համակերպվել նոր պահանջներին>>:
Հեռուստատեսությունը հատուկ լրջությամբ էր վերաբերվում Խորհրդային Հայաստանի տոնական հաղորդումներին: Նոյեմբերի 29-ի թողարկումները, որ ցուցադրվում էին սովետմիության տարածքով, փորձում էին լավագույնս ներկայացնել մեր երկրում արդյունաբերության, տնտեսության, գիտության ու մշակույթի զարգացումները:
