Միքայել Կճանյանը Հայաստանի հեռուստատեսության օպերատորների միջին սերնդի լավագույն ներկայացուցիչներից էր: Հեռուստատեսություն է եկել 1962-ին: Գ. Սունդուկյանի <<Քանդած օջախ>> , Շուկշինի <<Մինչեւ աքլորականչ>>, Բունինի <<Մութ ծառուղիներում>> հեռուստատեսային ներկայացումների բեմադրող օպերատորն էր:
1983-ին Քիշնեւում կայացած հեռուստաներկայացումների համամիութենական փառատոնում Հովհաննես Մելքոնյանի <<46 թվականը>> ներկայացումն արժանացավ գլխավոր մրցանակի, որի բեմադրող օպերատորն էր Միքայել Կճանյանը: Մասնակցել է առաջին տեսագրված ներկայացման նկարահանումներին` ռեժիսոր Օլգա Մելիք-Վրթանեսյանի <<Երկարագուլպա Պեպպի>>,նաեւ հայկական հեռուստատեսության` Մոսկվայի համար կատարված առաջին տեսագրմանը` սիմֆոնիկ նվագախմբի համերգը`Օհան Դուրյանի ղեկավարությամբ:
Արդեն 1992թ.ից Միքայել Կճանյանն Ինֆորմացիայի խմբագրության օպերատորական խմբի ղեկավարն էր: Այդ տարիներին լրատվությանը մեծ տեղ էր տրվում: Պետք էր բարձրացնել մատուցման որակը, նոր ձեւեր գտնել: Փորձառու, բանիմաց պրոֆեսիոնալների շնորհիվ կատարվեց մեծ աշխատանք: Միքայել Կճանյանն անձամբ մի շարք նկարահանումներ արեց CNN-ի համար: Ոտքով, կամերան ուսին շրջում էր տեղից-տեղ, սյուժեներ նկարահանում: Նրա ղեկավարած խմբի ջանքերով հայկական հեռուստատեսությունն աշխարհին կարողացավ պատմել մեր երկրում տիրող իրավիճակի մասին:
