Ներսես Կագրամանովը եղել է Հայաստանի հեռուստատեսության առաջին տնօրենը:
Հեռուստատեսության ստեղծման հենց սկզբից` 1956-ի հոկտեմբերից, Ներսես Կագրամանովն իր շուրջը հավաքեց այն մարդկանց, որոնց վերապահված էր կերտել մեր հեռուստատեսության պատմությունը: Նրա կողքին էին մարդիկ, որ պատրաստ էին օր ու գիշեր աշխատել` այս նոր մշակույթը կայացնելու եւ ոտքի կանգնեցնելու համար:
Հեռուստատեսություն գալով թատրոնից եւ կարեւորելով մշակույթի դերը` Կագրամանովը հեռուստատեսությունը դիտում էր որպես մշակութային արժեքների հետ հաղորդակցման միջոց, նա գիտակցում էր այն մեծ ազդեցությունը, որ հեռուստատեսությունը կարող է ունենալ հասարակության վրա: 1957թ.-ի փետրվարից սկսեցին եթեր հեռարձակվել գեղարվեստական մի շարք հաղորդումներ` <<Բեմի վրա է ժողովրդական դերասան Հրաչյա Ներսիսյանը>>, <<Պուշկինի պոեզիան>>, <<Մեկ դերասանի թատրոն. Սուրեն Քոչարյան>> եւ այլն:
Նրա ղեկավարության օրոք ստեղծվեց <<Շաբաթվա նորություններ>> տեղեկատվական թողարկումը, որը թեեւ սկզբնական շրջանում կանոնավոր պարբերականություն չուներ, սակայն շատ կարեւոր էր հեռուստատեսության կայացման ճանապարհին:
Ներսես Կագրամանովն անվանի թատերագետ է, ՀՍՍՀ արվեստի վաստակավոր գործիչ: Հեղինակն է <<Շրջանային թատրոնների բեմերում>>, <<Հինգ դիմանկար>>, <<Օստրովսկու դրամատուրգիան հայ բեմում>> եւ այլ գրքերի:
