Պերճ Ստեփանյանը մինչ պետական հեռուստաընկերության ղեկավար դառնալը համակարգում աշխատել էր շուրջ 25 տարի` 1967 թվականից: Նախասիրությունները մշակույթի հետ էին կապված, ինքն էլ աշխատում էր հեռուստատեսության այդ ճյուղում:
Հետեւաբար` դառնալով հեռուստատեսության ղեկավար, փորձում էր նույն ուղղությունը պահել` կարեւորելով գրական, մշակութային հաղորդումների առկայությունը:
<<Իմ աշխատանքի ընթացքում ամենից մեծ փորձությունը 1996թ. նախագահական ընտրություններն էին: Ամեն ինչ անում էի, որպեսզի նախագահի երկու թեկնածուներն էլ հավասար եթերաժամ ունենային, քանի որ համոզված էի` պետական հեռուստատեսությունը զուտ իշխանական չպետք է լիներ>>, - ասում է Պերճ Ստեփանյանը: Սա, բնականաբար, որոշ խնդիրներ էր առաջացնում, սակայն հեռուստատեսության ղեկավարը փորձում էր ետ չկանգնել իր սկզբունքներից:
Նրա ղեկավարության օրոք ստեղծվեց հայկական երկրորդ` <<Նորք>> ծրագիրը, որն ավելի շատ մշակութային-երիտասարդական էր: Փոփոխություններ տեղի ունեցան հեռուստատեսության կառուցվածքում, ստեղծվեցին նոր խմբագրություններ, նոր հաղորդաշարեր, վերականգնվեց հեռուստաթատրոնի աշխատանքը: Այդ տարիներին հեռուստատեսությունը մեծ շուքով նշում էր մեր մշակութային գործիչների հոբելյանները:
