Սուրեն Մուրադյանը եւս 58-ի համալրումներից էր: Ամեն ինչով հետաքրքրվում էր, չէր հեռանում ավագ գործընկերներից: Շուտով սկսեց ինքնուրույն հաղորդումներ նկարել եւ ճկունության, դիպուկ աչքի, ակնթարթորեն կողմնորոշվելու շնորհիվ անմիջապես ընդգրկվեց մեծամասշտաբ հաղորդումների մեջ: Տոնական հանդեսները, Լենինի հրապարակից հեռարձակվող շքերթները, հանրապետության այլ քաղաքներում եւ գյուղերում տեղի ունեցող զանգվածային միջոցառումների ամենավստահելի օպերատորն էր Սուրեն Մուրադյանը: Դրամատիկական հաղորդումներում եւս մեծ հաջողությունների հասավ: Շուտով առանց նրա դժվար էր պատկերացնել երգիծական հաղորդումները, կատակները, ամանորյա հանդեսները:

Հայաստանի հեռուստատեսությունում աշխատելու 40 տարիների ընթացքում Սուրեն Մուրադյանը ստեղծել է 150-ից ավելի բեմադրություններ, տարաբնույթ հաղորդաշարեր: 1975թ.-ին Ռուբեն Հախվերդյանի դիպլոմային աշխատանքով (Ս. Շտոկի <<Սատանայի ջրաղացը>>) ստեղծեց հայկական հեռուստատեսության առաջին գունավոր տեսաֆիլմը, որի համար Մոսկվայում արժանացավ բարձր կարգի հեռուստաօպերատորի կոչմանը եւ պարգեւատրվեց ԽՍՀՄ հեռուստատեսության առաջատարի մեդալով: Նրա որոնող աչքն ու միտքը օգնում էին ռեժիսորներին ցանկացած կերպարանք հաղորդել եթերից տրվող նյութին: Նրա մասնկացությամբ են նկարվել <<Միջնորդ տեր պապան>>, <<Սանիտայի քաղաքագլուխը>>, <<Ծղոտե գլխարկը>>, <<Կինո է նկարահանվում>> եւ շատ այլ ներկայացումներ:

1976-ից մարզական հաղորդումների խմբագրությունում: Այստեղ նրա շնորհիվ հեռարձակվեցին հանրապետությունում տեղի ունեցած բոլոր մարզական հանդիպումները, մասնակցեց համշխարհային եւ միջազգային մրցումների, համաշխարհային օլիմպիական, բարի կամքի, բարեկամության խաղերի եւ համաշխարհային փառատոնների: