<<Դպրոցն ավարտել էի, բայց բուհ չէի ընդունվել: Սիրում էի ընկերներիս հետ կանգնել Սայաթ-Նովա - Նալբանդյան փողոցների անկյունում: Մի օր էլ հենց այդտեղ հայրս մոտեցավ մեզ. <<Ինչով ես մտադիր զբաղվել, տղա ջա>>,- հարցրեց: Հեռվում երեւում էր հեռուստաաշտարակը: Այդ պահին այն կարծես խոշորացավ ու ինձ մոտեցավ: <<Ուզում եմ այ այնտեղ աշխատել>>- ասացի` մատնացույց անելով աշտարակը: Գնացինք հեռուստակենտրոն: Ինձ աշխատանքի ընդունեցին: Եկա, սիրեցի ու մնացի>>:
Դա 1969 թվականին էր: Այդ օրից ի վեր Վանիկ Ավագյանը նկարահանել է բազմաթիվ քաղաքական եւ գեղարվեստական հաղորդումներ, որոնք ցուցադրվել են աշխարհի տարբեր երկրներում: Նա հեռուստատեսության առաջին օպերատորն է, ով արժանացել է <<Ասուպ>> մրցանակի:
20 տարի անընդմեջ նա մասնակցել է ամանորյա տոնական հաղորդումների ստեղծմանը: Վերջին անգամ Վանիկ Ավագյանին է բախտ վիճակվել տեսաժապավենի վրա անմահացրել Արամ Խաչատրյանին, Առնո Բաբաջանյանին:
ՙԱյսօր լավ օպերատորներ քիչ կան: Օպերատորները ռեժիսորի ցուցումները մեխանիկորեն կատարողներ են դարձել: Այսօր մոռացել են,որ օպերատորը ռեժիսորի հետ պատասխանատու է կադրի համար: Հիշում եմ` ինչպես էինք վիճում ռեժիսորի հետ յուրաքանչյուր կադրի, անցումի համար: Օպերատոր ծնվում են` ինչպես նկարիչ, քանդակագործ: Կադրի զգացողություն, նկատելու ունակություն եւ բարձր ճաշակ է անհրաժեշտ: Այսօր օպերատորներից շատերը լույս դնել չգիտեն, իսկ դա մեր մասնագիտության այբուբենն է>>:
Վանիկ Ավագյանն այսօր արդեն օպերատորների նոր սերունդ է դաստիարակում, իր փորձն ու հմտությունը նորեկներին փոխանցում:
