Առաջին ալիք

1975-ը նշանակալից էր հեռուստատեսային կինոյի համար: Հոկտեմբերի 6-ից 12-ը անցկացվեց <<Երեւան>> ստուդիայի նկարահանած հեռուստաֆիլմերի շաբաթ, իսկ նոյեմբերի 5-ին երեխաներին ներկայացվեց հայկական առաջին մանկական հեռուստաֆիլմը: <<Փոքրիկ աղջկա եւ ավտոմեքենայի մասին>> կինոնկարը ստեղծվեց <<Երեւան>> ստուդիայի նորաստեղծ մուլտիպլիկացիոն արտադրամասում: 79-ի վերջին մեկը մյուսի ետեւից ցուցադրվեցին <<Երեւան>> կինոմիավորման արտադրած <<Խոնարհվիր վաղվա օրվան>> եւ <<Երկունք>> գեղարվեստական կինոնկարները:

1974-ի մայիսի 12-20-ը Դոնեցկում անցկացվեց հեռուստատեսային ֆիլմերի առաջին համամիութենական փառատոնը: Ներկայացված 60 ֆիլմերից մեր հեռուստատեսության նկարահանած <<Ալավերդու պղինձը>> փաստավավերագրական ժապավենն արժանացավ Ուկրաինայի ժուռնալիստների միության վարչության նախագահության պատվո դիպլոմին: 75-ի կեսերին Հայաստանի հեռուստատեսությունում ծնունդ առավ <<Մանրապատումների հեռուստաթատրոն>> հաղորդաշարը: Այն ներկայացնում էր հայրենական եւ արտասահմանյան գրողների պատմվածքները: Ամեն մի բեմադրություն բաղկացած էր մի քանի նովելից: Առաջին ներկայացումը Խոհեր պատերազմի մասին էր:

79-ի հունվարի 8-ին դրամատիկական հաղորդումների գլխավոր խմբագրությունն իր առաջին թողարկմամբ հեռուստադիտողին ներկայացավ <<Իմ տունը` քո տունն է>> երգիծական հաղորդաշարով: Հաղորդման ամեն մի բեմադրության հեղինակն էր դրամատուրգ Արտաշես Քալանթարյանը:

Հայկական հեռուստաֆիլմերի շաբաթ