Առաջին ալիք

Հեռուստատեսությունում փոխանակային հաղորդումների հիմքը դրվեց 1963թ.-ի մայիսի 28-ին կինոհաղորդումների խմբագրությունում ստեղծված բաժնով, որի մասնակցությամբ Թբիլիսիում պատրաստվեց <<Բարեկամության լրատու>> հեռուստահանդեսի առաջին հաղորդումը: Այս հանդեսը Հայաստանի եւ Վրաստանի հեռուստաէկրաններին ցուցադրվել է ամիսը մեկ անգամ:

<<Ցուցադրում է Հայաստանի հեռուստատեսությունը>> ծրագիրը Կենտրոնական հեռուստատեսությամբ ներկայացվեց 1964-ի դեկտեմբերի 15-ին: Այդ երեկո հայկական հեռուստատեսության ծրագրերը դիտեցին ԽՍՀՄ միլիոնավոր հեռուստադիտողներ: Առաջնային էր դարձել հանրապետությունում Կենտրոնական հեռուստատեսության ծրագրերի ընդունումը, որն իրականացավ Երեւան-Ռուսթավի ռադիոռելեային գծի շինարարությամբ: Արդեն 65-ից Հայաստանի հեռուստաեթերից փորձնական հաղորդումներ տրվեցին Մոսկվայից, Լենինգրադից, Թբիլիսիից: Հայաստան մտան նաեւ <<Ինտերվիդենիա>> եւ <<Եվրավիդենիա>> համակարգերը:

Դեռեւս 1961թ.-ի վերջերին եւ 62-ի սկզբներին ԽՍՀՄ կապի նախարարության գիտահետազոտական ինստիտուտի մի խումբ աշխատակիցների ստեղծած հատուկ սարքավորումների միջոցով հնարավորություն ստեղծվեց հեռարձակիչ գծային ցանցերը հարմարեցնել բազմածրագրային հաղորդումներին եւ ընդունել 2-3 ծրագիր: 63-ի սկզբին հայ կապավորները սկսեցին օգտագործել այս գծերը: Բացի քաղաքներում կատարվող վերակառուցումներից, զգալի աշխատանք կատարվեց նաեւ գյուղերում: Սակավ հզորության ռադիոցանցերը միացվեցին կապի նախարարության հանգույցներին, ավտոմատացվեց բոլոր հանգույցների կառավարումը:

Ցուցադրում է Հայաստանը