<<Մենք պարտադիր կերպով տոնում էինք Եղբայրական հանրապետությունների ազգային տոնը>>,- պատմում է Հայաստանի հեռուստատեսության առաջին երաժշտական խմբագիրներից Մարկ Պետրոսյանը:
- Անգիր հիշում եմ. Ադրբեջանի ազգային տոնը ապրիլի 28-ին էր: Դե, այդ օրն էր Ադրբեջանը խորհրդայնացվել: Ես նստած եմ վահանակի մոտ, հնչյունային ռեժիսորն եմ: Տեքստ էր գնում, պատմվում էր այդ հանրապետության խորհրդայնացման պատմությունը: Գյուղական դրվագներ էին, մարդկանց անցուդարձ, շրջապատի ձայնային էֆեկտներ: Արագ-արագ ձայնագրում էի: Արդեն հասել էինք ավարտին, երբ հաղթական երաժշտություն էր հնչում եւ պիտի հեռարձակվեր Ադրբեջանի օրհներգը...
Արդեն շոգ էր: Ստուդիան էլ մի լուցկու տուփի չափ տարածք էր: Դուռ, պատուհան բացած աշխատում էինք: Հաղորդումն ուղիղ եթերով էր հեռարձակվում: Իսկ ստուդիայի բակում շներն էին: Չգիտեմ նրանց դուր եկավ, թե ընդհակառակը` բարկացրեց մեր հարեւանների օրհներգը, բայց հանկարծ նրանք սկսեցին բարձրագոչ հաչալ: Պատկերացրեք, կադրում բարձրացվում է Ադրբեջանի ազգային դրոշը, հնչում է ազգային հիմնը` շների հաչոցների զուգակցմամբ: Գոռում եմ` ով է շներին ներս թողել, դուրս տարեք դրանց, բայց արդեն ուշ էր: Դրոշը բարձրացվեց, հիմնը հնչեց... շների ձայնակցությամբ:
Իհարկե, նկատողություն ստացանք, բայց դիպվածի բացատրությունը մի փոքր մեղմեց ղեկավարներին:
