1973թ.-ի մարտի 17-ից հեռուստատեսությունը մշտական աշխատանքի է հրավիրում գունավոր շարժակայանի, հեռուստատեսության արտադրական լաբորատորիայի, հաղորդման տեսագրման առաջին ինժեներներին: Սկսվում են սեփական գունավոր հաղորդումները եթեր հեռարձակելու նախապատրաստական աշխատանքները:
1973թ.-ի մայիսմեկյան շքերթը Երեւանի Լենինի անվան հրապարակից հեռարձակվեց գունավոր պատկերմամբ: Սկզբնական շրջանում գունավոր հաղորդումները տրվում էին միայն շարժակայանով` հանրապետության խոշոր տոնակատարություններից, հանդեսներից, մարզական միջոցառումներից: Արդեն 78-ից Հայաստանի հեռուստատեսության առաջին եւ երկրորդ ծրագրերի հաղորդումների մոտ 50 տոկոսը եթեր էր տրվում գունավոր պատկերով:
73-ի օգոստոսից սկսվեցին եթեր հեռարձակվել նաեւ առաջին տեսագրված հաղորդումները, որոնք 1978-ին կազմում էին հաղորդումների 70 տոկոսը:
71-ից 79 թթ.-ին եթերն առատ էր հատկապես սեփական կինոնկարներով եւ գեղարվեստական հաղորդումներով: <<Ցուցադրում է հեռուստատեսային կինոտունը>> խորագրով ներկայացվում էին գրական-գեղարվեստական նյութեր, բեմադրություններ, կինոնկարներ, 71-ի հունվարի 25-ին ցուցադրվեց Թամարա Բիտյուցկայայի բեմադրած <<Երեկոյից մինչեւ կեսօր>> 3 գործողությամբ դրաման: Այս թվականներին թատերասերներին է հանձնվել մոտ 40 բեմադրություն` Շիրվանզադեի <<Շառլատանը>>, Թ. Ուիլյամսի <<Ցանկության տրամվայը>>, Իբսենի <<Պեր Գյունտը>> եւ այլն: Իսկ 71-ի դեկտեմբերի 25-ին կինոհաղորդումների բաժինը ԽՍՀՄ-ում առաջին անգամ բացեց <<Վավերագրական կինոյի ժամ>> նոր հաղորդաշարը: Մինչ 84-ի փետրվարն այն եթեր է հեռարձակվել ամիսը մեկ անգամ, այնուհետեւ` 3 անգամ:
