1988 թ.-ի դեկտեմբերի 7-ին, ժամը 11:41 րոպեին բնության ահարկու տարերքը հազարավոր հայերի կյանք խլեց, հիմնովին ավերվեցին գյուղեր, քաղաքներ: Հայաստանի հյուսիսային շրջանների բնակավայրերը հաշված վայրկյանների ընթացքում ավերակների վերածվեցին:
Սպիտակի երկրաշարժի առաջին իսկ օրերից հեռուստատեսության լրատվության գլխավոր խմբագրության լրագրողներն աղետի գոտում էին: Այստեղից պատրաստված ռեպորտաժներով էին սկսվում եւ ավարտվում <<Լրաբերի>>, <<Վերջին լուրերի>> հատուկ թողարկումները: Հեռուստատեսության նկարահանող խմբերի տեսանյութերը դարձան ոչ միայն Հայաստանի, այլեւ աշխարհի հեռուստաընկերությունների սեփականությունը: Դրանք հեռարձակվում էին Կենտրոնական հեռուստատեսության <<Ժամանակ>> ծրագրով, աշխարհի տարբեր առաջավոր հեռուստաընկերությունների եթերներով:
<<Փյունիկ. վերականգնման խրոնիկա>> խորագրով հաղորդաշարի թողարկումներ էին պատրաստում բոլոր գլխավոր խմբագրությունները: Հաղորդաշարի նպատակն էր հեռուստախցիկի օբյեկտիվով հետեւել աղետի գոտու վերականգնման աշխատանքներին: Եթեր տրվեց ՙՄտորումներ երկրաշարժի մասին՚ հաղորդաշարը, որտեղ ընդգրկվեցին հեղինակավոր գիտնականների եւ մտավորականների կարծիքները, վերլուծությունները մեծ արհավիրքի վերաբերյալ:
Երկրաշարժից հետո հազարավոր մարդիկ փնտրում էին իրենց հարազատներին, ընկերներին: <<Երեւանը եւ երեւանցիները>> խմբագրությունը հանրապետության ներքին գործերի նախարարության հետ համատեղ ստեղծում է <<Որոնում>> ծառայությունը եւ նույնանուն ծրագիրը: Հաղորդման թողարկումները եթեր էին տրվում շաբաթական հինգ անգամ, օգնում մարդկանց գտնել երկրաշարժից տուժած իրենց մտերիմ-հարազատներին:
