1968թ.-ին տոնվում էր Երեւանի հիմնադրման 2750-ամյակը: Համամիութենական տոն էր: Մեծ աշխատանք արեցին Հայաստանի ռադիոն եւ հեռուստատեսությունը: Տոնի առթիվ միութենական հանրապետությունների համար պատրաստվեցին ռադիոհեռուստատեսային հաղորդումներ` ավելի քան 30 ժամ տեւողությամբ:
Առաջին միջոցառումներից մեկը տեղի ունեցավ Ղազախստանում` 68-ի մայիսին: Նման 10-օրյակներ անցկացվեցին նաեւ միութենական մյուս հանրապետություններում: Տոնախմբության եզրափակիչ միջոցառումը տեղի ունեցավ հոկտեմբերի 18-ին եւ 19-ին: Ռադիոյի եւ հեռուստատեսության լրատվության գլխավոր խմբագրությունները Ալ. Սպենդիարյանի անվան օպերայի եւ բալետի պետական ակադեմիական թատրոնից հեռարձակեցին հոբելյանական հանդիսավոր նիստը, իսկ 19-ին, ժամը 10-ին` էրեբունի ամրոցի ստորոտին գտնվող թանգարանի բացման արարողությունը:
Կենտրոնական հեռուստատեսությամբ Հայաստանի հեռուստատեսությանը հատկացվեց 1,5 ժամ ուղիղ եթեր: Հանդիսության կազմակերպիչը եւ խմբագիրը Մարկ Պետրոսյանն էր, իսկ ռեժիսորը` Կիմ Արզումանյանը: Հայկական պատվիրակության մեջ էին գիտնականներ, ակադեմիկոսներ, ժողովրդական գործիքների եւ պարի համույթներ, ինչպես նաեւ` Ռուբեն Մաթեւոսյանը, Վաչե Հովսեփյանը, Գոհար Գասպարյանը, Լուսինե Զաքարյանը եւ այլ հանրաճանաչ արվեստագետներ: Հաղորդումը հեռարձակվեց նաեւ եվրոպական երկրներում <<Ինտերվիդենիա>> ցանցով:
