Ազգային հեռուստատեսության կազմավորման առաջին իսկ օրերին հարց բարձրացվեց ստեղծել հեռուստատեսային ազդականչ: Երաժշտական հաղորդումների գլխավոր խմբագիր, կոմպոզիտոր Արամ Սաթունցի առաջարկով հեռուստատեսություն հրավիրվեց <<Ես իմ անուշ Հայաստանի>> հանրահայտ երգի հեղինակ, Արամ Սաթունցի ավագ եղբայր Աշոտ Սաթյանը: Նա <<Դավիթ Բեկ>>,<<Անահիտ>> ֆիլմերի երաժշտության եւ <<Մարտիկի երգը>>« <<Լավ լսեք ինձ>> երգերի հեղինակն էր:
<<Բազմամարդ սենյակում սկսվեց մեկը մյուսին ժխտող առաջարկությունների մի կակոֆոնիա` թե էսքիզների համար հարկ է հրավիրել մուլտիպլիկատոր նկարիչ կամ էլ էկրանին ուղղակի ցուցադրել երեւանյան տեսարանների լուսանկարները>>,- պատմում է հեռուստատեսության երաժշտական ռեժիսոր Մարկ Պետրոսյանը:
- Մեր գլխավոր ռեժիսոր Մարատ Մարինոսյանը վերջակետ դրեց <<խորհրդակցությանը>>` ոչ մի մուլտիպլիկատոր, ոչ մի լուսանկար: Մեզ անհրաժեշտ է այնպիսի մի գործ, որ ընդունվի, սիրվի ժողովրդի կողմից: Առաջարկում եմ հրավիրել ճարտարապետ Ռաֆայել Իսրայելյանին: Ռաֆայել Իսրայելյանի հետ հանդիպել էին Մարատ Մարինոսյանն ու մեր նկարիչ-բեմադրող Շահեն Հակոբյանը: Օրեր անց ողջ կոլեկտիվով ներկա էինք իսրայելյանական էսքիզների քննարկմանը: Սեւ տուշով կատարված տասնյակ էսքիզները պատկերում էին Մասիս սարը, Սասունցի Դավթի արձանը, երեւանյան տեսարաններ, տարածվող ռադիոհեռուստատեսային ալիքներ: Հատակին փռված նկարների մանրամասները փութաջանորեն բացատրում էր հեղինակը:
Շատ շուտով Հայաստանի հեռուստատեսության ազդանշանը արդեն պատրաստ էր` <<Ես իմ անուշ Հայաստանի>> երգի մեղեդիով,Երվանդ Քոչարի ՙՍասունցի Դավիթ>>-ի պատկերով: Էկրանին ազդականչի հայտնվելուց հետո հաղորդավարուհի Նառա Շլեպչյանը ողջ Հայաստանին դիմում էր <<Բարի երեկո« հարգելի հեռուստադիտողներ>> բառերով:
