Քառակի հոբելյանական տարին1982 թվականին նշվեց չորս հոբելյան. փետրվարին լրացավ հայկական հեռուստատեսության քառորդ դարը, 25 տարի առաջ նկարահանվեց առաջին հեռուստատեսային ֆիլմը, լրացավ <<Երեւան>> ստուդիայի 10-ամյակը, իսկ աշնանը նշվեց <<Եթերում է Երեւանը>> շաբաթաթերթի 25-ամյակը:
25-ամյա գործունեության առիթով հեռուստատեսությունը պատրաստեց եւ եթեր հեռարձակեց <<Էկրանից այն կողմ>> հաղորդումը, որով մանրամասն ներկայացվեց հեռուստատեսության աշխատանքը, ստուդիայի տարբեր օղակների առօրյան, ստեղծագործական այն բարդ ճանապարհը, որով անցնում էր յուրաքանչյուր հաղորդում:
1980-88թթ..-ի ընթացքում Հայաստանի հեռուստատեսությունը շարունակում է ստեղծել նորանոր հաղորդաշարեր, կազմակերպում հանրապետական միջոցառումներ: 80թ.-ի հունիսին մեր երկրի տարբեր քաղաքներում եւ շրջաններում անցկացվեց հոբելյանական փառատոն, որին մասնակցեցին հեռուստառադիոպետկոմի բոլոր երաժշտական խմբերը եւ մենակատարները: Երաժշտական հաղորդումների խմբագրությունը նպատակ ուներ ներկայացնել, ցուցադրել մեր ժողովրդի վերջին 60 տարվա ստեղծած լավագույն արժեքները: Միութենական բոլոր հանարապետությունների եթերով, նաեւ Կենտրոնական հեռուստատեսությամբ հնչել են հայկական երգն ու երաժշտությունը, ներկայացվել է հայ երգարվեստը: 1983թ.-ի հունիսի 13-ին, ժամը 20:30-ին Հայկական հեռուստատեսությունը ներկայացրեց հերթական անակնկալը` <<Երեւան>> ստուդիայում նկարահանված <<Անուշ>> ֆիլմ-օպերան:
