1962-ին նոր էի վերադարձել բանակից եւ կարոտած քայլում էի Երեւանի փողոցներով; Հանդիպեցի նախկին հարեւանիս` Հրաչ Մելքոնյանին, որն աշխատում էր հեռուստատեսությունում:Հրավիրեց հեռուստատեսություն: Թեպետ միանգամայն անծանոթ ոլորտ էր, բայց հաջորդ առավոտյան գնացի ռադիոկոմիտե: Ինձ տեսնելուն պես` Հրաչը վեր կացավ տեղից, <<աշխատիր, տղա ջան, աշխատիր>> ասելով` ներկայացրեց ռեժիսորներ Գրիգոր Էյրամջյանին ու Գուրգեն Աբաջյանին: Շարժական կայանով պետք է մեկնեինք սարքաշինական գործարան նկարահանումների: Լուսարձակները տեղադրեցի ավտոբուսում: Քիչ անց եկավ նաեւ օպերատոր Էդմոնդ Հակոբյանը, եւ մենք մեկնեցինք: Աշխատանքային առաջին իսկ օրը շատ չարչարվեցի: <<Տուն վերադարձա հոգնած, կեղտոտված, բայց աշխատանքը հետաքրքիր էր ու գրավիչ>>,- պատմում է հեռուստաօպերատոր Ալբերտ Հովսեփյանը:
- Լավ եմ հիշում, այդ տարիներին նկարահանումներ էինք կատարում կենտրոնական հեռուստատեսության <<Ժամանակ>> լրատվական ծրագրի, նաեւ մեր <<Համայնապատկերի>>, հետագայում` <<Լրաբերի>> համար: Օրվա իրադարձությունները լուսաբանող նյութեր նկարելուց բացի, մասնակցում էի նաեւ հեռուստաֆիլմերի ստեղծմանը: Մի շարք ֆիլմեր նկարահանեցինք Լենինի ծննդյան 100-ամյակի կապակցությամբ: Ռեժիսորը Գրիգոր Էյրամջյանն էր£ Հանդիպեցինք Լենինի հետ շփված տարբեր մարդկանց` գրող-հրապարակախոս Մարիետա Շահինյանին, Լենինի վարորդ հայազգի Միրոն Օհանովին, Լենինի գրադարանավարուհի Շուշանիկ Մանուչարյանցին եւ այլոց: Լենինի 100-ամյակի օրերին Մոսկվայում նկարահանումներ էին կատարում գրեթե բոլոր հանրապետությունների ներկայացուցիչները: Ռեժիսոր Ներսես Հովհաննիսյանը` Ներսիկը, Կրեմլում նկարահանումներ կատարելու թույլտվություն կարողացավ ստանալ: Հայաստանի Մինիստրների սովետի նախագահ Բադալ Մուրադյանի առաջարկով նկարահանումներ կատարեցինք Լենինի աշխատասենյակում: Ի դեպ, նրա աշխատասեղանի վերեւում Հայաստանի քարտեզն էր փակցված:
