80-ականների սկզբներին Հայաստանի հեռուստատեսությունը տարեկան ստեղծում էր մոտ 200 բեմադրություն, թատերական ներկայացում, վավերագրական ու գեղարվեստական կինոնկար, գրական-երաժշտական հաղորդում: 81-ի հոկտեմբերի 13-ին Ալեքսանդր Սպենդիարյանի անվան պետական ակադեմիական թատրոնում բացվեց հեռուստատեսային կինոյի 9-րդ փառատոնը: Երեւան էին ժամանել ԽՍՀՄ բոլոր հանրապետությունների կինոաշխարհի ներկայացուցիչներ: Հայաստանի հեռուստատեսությունը հեռարձակեց փառատոնի 10 օրերի ընթացքում ցուցադրված բոլոր ֆիլմերը: Հայաստանի ներկայացրած <<Ձորի Միրոն>> արժանացավ փառատոնի հանձնաժողովի մրցանակին, իսկ երաժշտական ֆիլմերի հանձնաժողովի մրցանակը տրվեց հայ կինոմատոգրաֆիստների ստեղծած <<Երգի վերադարձը>> ֆիլմին:
81-ի հոկտեմբերին Ռիգայում անցկացվում էր <<Մարդը եւ ծովը>> միջազգային փառատոնը, որի մրցանակակիրը դարձավ <<Երեւան>> ստուդիայի <<Ջուր>> կինոնկարը:
1981թ.-ի ապրիլի 4-ին հեռուստատեսության ծրագրերի տնօրինության կինոցուցադրումների բաժինը բացեց <<Համաշխարհային կինոյի վարպետները>> մշտական հաղորդաշարը: Հաղորդմամբ հեռուստադիտողին էին ներկայացվում աշխարհի լավագույն կինոմատոգրաֆիստների ստեղծագործություններից հատվածներ, մեկնաբանվում եւ վերլուծվում էին դերակատարումներ, սցենարներ: Արդեն 85-ի հունիսի 7-ից ամեն ուրբաթ հաղորդաշարը ներկայանում էր <<Հանդիպում>>անվամբ: Փոքր էկրանից եթեր էին տրվում համաշխարհային կինոյի գլուխգործոցները, հանդիպումներ էին կազմակերպվում կինոգետների եւ դերասանների հետ:
