Առաջինը Հայաստանում
Հանրային հեռուստաընկերության հաղորդումների ցանցի հեռարձակումն իրականացվում է հանրապետության ամբողջ տարածքով սփռված ռադիոռելեային գծերի եւ արբանյակային ընդունիչ կայանների միջոցով:
Այսօր Հ1-ի հաղորդումները կարող են դիտել Հայաստանի հանրապետության ամբողջ տարածքում, ինչպես նաեւ` Ջավախքում եւ Արցախում: 1957թ.-ին` հայկական հեռուստատեսության կազմավորման առաջին տարիներին, երբ հանրապետությունում կար ընդամենը 250 հեռուստացույց, հաղորդումներն ընդունում էին միայն Երեւանն ու նրան հարող բնակավայրերը` 60 կմ տրամագծով: Արդեն 70-ականներին տեխնիկական լուրջ բարեփոխումներ տեղի ունեցան: 1970թ.-ի նոյեմբերին գործարկված Երեւան-Ղափան ռադիոռելեային
գիծը հնարավորություն տվեց Զանգեզուրի բնակիչներին դիտել երկու հեռուստատեսային ծրագիր: 71-ի մայիսից Շիրակի ամբողջ դաշտավայրում եւս կարողացան դիտել Երեւանի եւ Մոսկվայի ծրագրերը, իսկ 73-ի հունվարի 1-ից` Վայքի բնակիչները: 1977թ.-ի նոյեմբերի 29-ին գործարկվեցին 311.7 մետր բարձրությամբ նոր հեռուստաաշտարակը եւ ՙՕրբիտա-2՚ տիեզերական կապի կայանը, որոնք հնարավորություն տվեցին հաղորդումները հեռարձակել հանրապետության գրեթե ողջ տարածքում:
Այսօր Հ1-ն ամենամեծ հեռարձակման գոտին ապահովող հեռուստաընկերությունն է ոչ միայն Հայաստանի Հանրապետությունում, այլեւ` Հարավային Կովկասի երկրների մեջ:
Հայաստանի հանրային հեռուստաընկերության ծրագիրն այսօր կարելի է դիտել Եվրոպայում, Հյուսիսային Ամերիկայում եւ Ավստրալիայում: 2005թ.-ի փետրվարից Համահայկական հեռուստատեսության արբանյակային հեռարձակումն իրականացվում է գերժամանակակից, նորագույն արբանյակներով` Եվրոպայում մեր հաղորդումները հեռարձակվում են EutelSat W1 եւ Hot Bird 6 արբանյակների միջոցով, Ամերիկայի միացյալ նահանգներում` Intelsat Americas 5:
Այսօր Հանրային հեռուստատեսությունն ունի հայկական ամենախոշոր հեռարձակման ցանցը: Մենք աշխարհի այն եզակի հեռուստաընկերություններից ենք, որ գրեթե նույնքան հեռուստադիտող ունենք արտերկրում, որքան` երկրի ներսում:
2001թ.-ին Հանրային հեռուստատեսության եւ "GlobeCast" ընկերության միջեւ կնքված պայմանագրի արդյունքում հայկական ծրագրերը արբանյակային հեռարձակմամբ սփռվեցին նաեւ ԱՄՆ-ում եւ Կանադայում:
