60-ականների կեսերից երաժշտական հաղորդումների գլխավոր խմբագրությունը մեկը մյուսի ետեւից ցուցադրում է օպերաներ, բալետներ, մշտական եթերաժամով հեռարձակվում են պարի եւ երգի հայկական անսամբլները: Առանձին հաղորդումներով ներկայացվում էին ճանաչված կոմպոզիտորների եւ երգիչների կայնքն ու գործունեությունը:
66թ.-ից գործում է Հայաստանի հեռուստատեսության եւ ռադիոյի սիմֆոնիկ նվագախումբը, որի գեղարվեստական ղեկավարն էր Օհան Դուրյանը: Նվագախումբն իր առաջին համերգը տվել է 1966թ.-ի մայիսի 6-ին` ռադիոյի օրվա առիթով: 1970-ից մինչեւ 83թ.-ը սիմֆոնիկ նվագախմբի մենակատարն էր հանրապետության ժողովրդական արտիստուհի, պետական մրցանակի դափնեկիր Լուսինե Զաքարյանը: Սիմֆոնիկ նվագախմբից բացի, այդ նույն ժամանակահատվածում ստեղծվում է էստրադային նվագախումբը: 66-ի սեպտեմբերից նվագախմբի գեղարվեստական ղեկավարն էր Մարտին Վարդազարյանը, իսկ 72-ից` Մելիք-Մավիսակալյանը:
1979թ.-ին Հեռուստատեսության եւ ռադիոյի նվագախմբերի շարքում ավելացավ եւս մեկը: Կոմպոզիտոր Էդգար Հովհաննիսյանի նախաձեռնությամբ ստեղծվեց կամերային երգչախումբը: 84թ.-ից երգչախմբի գեղարվեստական ղեկավարը եւ գլխավոր դիրիժորն էր Տիգրան Հեքեքյանը:
Հայկական ժողովրդական եւ էստրադային երգի տարածմանն գործում մեծ դեր է ստանձնում երաժշտական հաղորդումների խմբագրության <<Երաժշտական փոստարկղ>> հաղորդաշարը: Առաջին հաղորդումը եթեր հեռարձակվեց 1977թ.-ի նոյմեբերի 25-ին: Բացի հայկական երաժշտությունից, հաղորդումը հեռուստադիտողին էր ներկայացնում տարբեր ժանրերի եւ ժողովուրդների երգարվեստը: Սկզբնական շրջանում հաղորդումը եթեր էր տրվում ամիսը մեկ անգամ` վերջին շաբաթ օրը: Այնուհետեւ հաղորդումը դարձավ ամենշաբաթյա:
