1970թ.-ի դեկտեմբերի ՀԽՍՀ Գերագույն խորհրդի նախագահության հրամանագրով ռադիոհաղորդումների եւ հեռուստատեսության պետական կոմիտեն վերանվանվեց Միութենական հանրապետական հեռուստատեսության եւ ռադիոհաղորդումների պետական կոմիտե: Նույն օրն էլ Հեռուստառադիոպետկոմի նախագահ նշանակվեց Ստեփան Պողոսյանը:
70-ականների սկզբներից մի շարք ռադիո եւ հեռուստատեսային խմբագրություններ միաձուլվեցին` ստեղծելով միացյալ գլխավոր խմբագրություններ: Շահագործման հանձնված ապարատա-ստուդիական նոր համալիրը մոտ տասն անգամ ավելացրեց հաղորդումների հեռարձակման որակը: 70թ.-ի նոյեմբերին գործարկված Երեւան-Ղափան ռադիոռելեային գիծը հնարավորություն տվեց Զանգեզուրի բնակիչներին դիտել երկու հեռուստատեսային ծրագիր: Պայմաններ ստեղծվեցին նաեւ հաղորդումներ հեռարձակել Ղափանից, Քաջարանից, Սիսիանից եւ Գորիսից: 71-ի մայիսից Շիրակի ամբողջ դաշտավայրում եւս կարողացան դիտել Երեւանի եւ Մոսկվայի ծրագրերը, իսկ 73-ի հունվարի 1-ից` Վայքի բնակիչները:
1974-ի տարեվերջին շահագործման հանձնվեց անդրկովկասյան ամենախոշոր վերահաղորդիչ կայանը, որը հնարավորություն տվեց Ղուկասյանի եւ Ամասիայի բնակիչներին դիտել Հայաստանի եւ Կենտրոնական հեռուստատեսության հաղորդումները:
<<Միացրեք հեռուստացույցի 11-րդ ալիքը>>,- 1973թ.-ի <<Եթերում է Երեւանը>> ծրագրերի շաբաթաթերթի 40-րդ համարը այս վերնագրով է տեղեկացնում Հայաստանի հեռուստատեսության երկրորդ ծրագրի եթերամուտը:
