1957 թ.-ի օգոստոսի 6-ին եթեր հեռարձակվեց առաջին տեղեկատվական թողարկումը` <<Շաբաթվա նորությունները>>, որը սկզբնական շրջանում պարբերական չէր եւ միայն 58-ի փետրվարից հայկական հեռուստատեսության լրատվական թողարկումը` <<Նորություններ>> անվամբ, դարձավ պարբերական: Այդ ժամանակ էլ ստեղծվեց հեռուստատեսության լուրերի խմբագրությունը: Առաջին քաղաքական մեկնաբաններից էին Ջոն Կիրակոսյանը, Հակոբ Հակոբյանը:
Հասարակական-քաղաքական հաղորդումները ստեղծվում էին գեղարվեստականին զուգահեռ, սակայն զարգանում էին առավել դանդաղ: Դեռեւս ձեւավորված չէր հեռուստալրագրությունը:
Հեռուստատեսության լրագրողներ դարձան մամուլի կամ ռադիոյի աշխատակիցները: Ռադիոյի եւ հեռուստատեսության լրատվական խմբագրություններն աշխատում էին միեւնույն շենքում: Հեռուստատեսային լուրերը սկզբնական շրջանում վերցվում էին ռադիոյից կամ նմանակում ռադիոյի նորությունները: Որպես տեսաշար հեռուստալրագրողներն օգտագործում էին լուսանկարներ, քարտեզներ, կինոխրոնիկայի կադրեր:
Մեծ ուշադրություն էր հատկացվում լրատվական հաղորդումներին: <<Նորությունները>> ուներ նաեւ <<Շաբաթվա նորություններ>>, <<Վերջին լուրեր>>, <<Հեռուստատեսային լուրեր>> թողարկումները: Կար թեմատիկ բաժանում. հասարակական-քաղաքական, որոնք հաճախ մատուցվում էին առանց տեսանյութի, միջազգային լուրերը լրատվական գործակալությունների հաղորդագրություններից ընթերցում էր խոսնակը, մշակութային նորություններն ամենաքիչ տեղն էին զբաղեցնում, իսկ մարզականները միայն ֆուտբոլի մասին էին:
