Big picture

Հ/Ս «Պատվի համար»

Սերիալի հիմքում ընկած է Ալ․ Շիրվանզադեի «Պատվի համար» պիեսի սյուժեն, որի գործողությունները տեղի են ունենում Հայաստանում, մեր օրերում։

Հայ դասական գործի ասելիքն այսօր էլ արդիական է․ պատվի, արժանապատվության, բարոյականության և համամարդկային այլ մնայուն արժեքների հարցը, որի հիմնական կրողներն են սերիալում Արտաշես Օթարյանը (Սոս Ջանիբեկյան) հայտնի գործարար Անդրեաս Էլիզբարյանի (Ալեքսանդր Խաչատրյան) կրտսեր դուստրը՝ Մարգարիտը (Մանե Մխոյան)։

Անխաթար հավատքի և աստվածավախության մարմնացում է Էլիզբարյանի կինը՝ Երանուհին (Աննա Էլբակյան), ով Արտաշեսի ու Մարգարիտի հետ՝ իր ուժերի ներածին չափով նույնպես պայքարում է շահի ու ազնվության, փողի ու խղճի այս հակամարտության մեջ։

Ինչպես Շիրվանզադեի պիեսում, սերիալում նույնպես՝ Անդրեաս Էլիզբարյանը կողոպտել է իր գործընկեր Առաքել Օթարյանին և անօրինական ճանապարհով տիրացել նրա ունեցվածքին։ Ամուսնու մահից հետո Առաքել Օթարյանի սնանկացած ու տարաբախտ կինը երկու մանկահասակ զավակների հետ միասին մեկնել է Մոսկվա։ Անցել են երկար տարիներ․․․ Օթարյանի կինը մահվան մահճում որդուն՝ Արտաշեսին խոստովանում է, որ ընտանիքի հայրը մահացել է անհասկանալի հանգամանքներում, իրենց ունեցվածքը հափշտակել է ամուսնու ընկերը, որի մասին վկայող փաստաթղթերը պահված են գյուղի հին տանը։ Կատարելով մոր վերջին ցանկությունը՝ հանգչել հարազատ հողում՝ ամուսնու կողքին, Արտաշես Օթարյանը, որ ավելի քան քսան տարի չի եղել Հայաստանում, գալիս է Հայաստան։

Սկսվում են փաստաթղթերի որոնումները և հոր սպանության հանգամանքների բացահայտման գործընթացը։ Դատական արխիվում Արտաշես օթարյանը ծանոթանում է Մարգարիտի հետ, ով փաստաբան է և, առանց իմանալու, որ հետքերը տանելու են ուղիղ իր հարազատ հոր վրա՝ խոստանում է օգնել Մոսկվայից ժամանած անծանոթ երիտասարդին։ Գործնական հանդիպումների ընթացքում Մարգարիտի ու Արտաշեսի մեջ համակրանք է առաջանում, որ հետագայում վերածվում է իսկական ու անձնվեր սիրո։

Սերիալի կենտրոնական հերոսներից է Մերուժանը՝ Արտաշեսի մորեղբայրը (Մկրտիչ Արզումանյան), ով մտերիմ է Էլիզբարյանների ընտանիքի հետ։ Արտաշեսը Երևանում հանգրվանել է հենց նրա տանը և իր կասկածները, մտքերը, անելիքներն ու արդեն արածները կիսում է նրա հետ՝ որպես հարազատի։ Մերուժանն այդ ամենի մասին զեկուցում է Էլիզբարյանին, բայց դեպքերի զարգացման ընթացքում՝ մտերմանալով քրոջ որդու հետ, մոտիկից ճանաչելով ու կապվելով նրա հետ՝ Մերուժանի կերպարը տրանսֆորմացիա է ապրում, խղճի խայթոցներ, և իր կնոջ՝ Աշխենի մշտական հորդորների, նախատինքների ազդեցությամբ՝ փոխվում է։

Բացի Մարգարիտից, Էլիզբարյանն ունի ևս մի դուստր՝ թեթևամիտ Ռոզալին, և երկու որդի՝ ողջամիտ Բագրատ Էլիզբարյանն ու ցոփաբարո Սուրենը, ով մսխում է հոր փողերը, պարտք անում քեռուց՝ Սաղաթելից (Ֆրունզիկ Ամիրխանյան)։

Ինչպես պիեսի ֆինալում, այդպես էլ սերիալում Արտաշեսը Մարգարիտին է հանձնում գտնված փաստաթղթերը, իսկ Էլիզբարյանը՝ փորձելով փրկել իր պատիվը, Մարգարիտից վերցնում է փաստաթղթերն ու այրում բուխարու մեջ։ Մարգարիտն անկարող լինելով այլևս նայել Արտաշեսի աչքերին, իր պատիվը համարելով այրված՝ ինքնասպան է լինում։

Ի տարբերություն պիեսի՝ սերիալում հեռոստադիտողը տեսնում է Մարգարիտի հիվանդանոցում՝ վերակենդանացման բաժնում, և հնչում է Սուրենի անպատասխան հարցը՝ «Նա կապրի՞»:

Սերիալը բաղկացած է տասնվեց մասից, հագեցած է անակնկալ բացահայտումներով ու գործողությունների դինամիկ զարգացմամբ: Սցենարի հեղինակն է Անահիտ Աղասարյանը, ռեժիսորը՝ Հրաչ Քեշիշյանը, պրոդյուսերը՝ Արման Միտոյանը։

Անոնսներ